వివిన మూర్తి వెదుకులాట

అమ్మను వెదుక్కోటంతో ఆరంభం మనిషి.

వాడు ఇదేమిటి అదేమిటి అంటూ ప్రశ్నల వాడైతే జవాబుల కోసం వెదుకులాట.

48 మే 21న మొదలైన నేను ఎప్పుడో అప్పుడు ముగిసిపోతాను.

ఈ మధ్యలో నాకు కలిగిన ప్రశ్నలను, దొరికిన జవాబులను ఇంతకాలం కథలల్లాను. వ్యాసాలు రాసాను.

వాటిల్లో కొందరు గుర్తుంచుకునేవి వ్యాపారబంధాలు, హంసగీతం, విమానం వచ్చింది, అలసిన కన్నులు, పాడుకాలం వంటి నవలలు. పయనం-పలాయనం, స్పర్శ, జ్ఞాతం, కృష్ణస్వప్నం, వాల్ పేపర్, మాయ-మహామాయ వంటి కథలు. అందరూ మరోమారు చదవాలని నేను కోరేవి జగన్నాటకం(jagannatakam), కాలమహిమ, గోగ్రా, అఖండదృష్టి వంటివి. నా జీవన సహచరి వి. రామలక్ష్మి రాసిన కథలు సైతం  ఈ బ్లాగులో చేరతాయి.

ఛందోబద్ధ కవిత్వం రాసిన నాడూ  ప్రశ్నలే జవాబులే.

జవాబులు తప్పితే కోపం, దుఃఖం . అనవసరమే. తెలుసు. కాని కొందరికి తప్పవు.

ఇదో అంతులేని వెదుకులాట. ఇలాంటి వెదుకులాటలో చాలామంది ఉంటారని నా సాహిత్యానుభవం చెపుతోంది. అలాంటివాళ్లు కొందరు  ఈ అంతర్జాల మాధ్యమంలో దొరకుతారేమోనన్న ఆశతో.. వా వెదుకులాటలో వారూ, వారి వెదుకులాటలో నేనూ సహచరులం కావాలని.. ఈ బ్లాగు నా 65వ పుట్టినరోజున ఆరంభిస్తున్నాను.

ఇందులో నా వెదుకులాటలో నన్ను అబ్బురపరిచిన కథలూ, విశేషాలు, వ్యాసాలు చేరుస్తాను.

మీరూ వాటిగురించి ఆలోచించి ఏదైనా అంటే సంతోషిస్తాను. వివిన మూర్తి